Nakaligtaan ko na naman ang nakaplanong araw ng pagdalaw. Kaya ngayon ay babalikan na lang ang mga alaala. Mula sa mga litrato at mga kathang magdadala muli sa akin sa matamis na yakap ng aking mahal na tahanan.
Maraming masasayang karanasan, mga pagsubok na nilampasan, at mga taong naging malaking parte ng pagkilala sa aking sarili. Salamat at ngayon ay gusto ko na talagang bumyahe at mag-isang lakbayin ang daan sa mga nakalipas na panahon.
Elbi, hintayin mo ako sa aking pagbabalik. 😀
Umaalingawngaw ang bawat tipa sa piyesa
Bawat kalabit sa kuwerdas ng gitara
Dinadala ang iilang natitirang alaala
Ngayong kanta na lamang ang nakakasama
Dahan-dahang ibinabalik ang nawalang nota
Taimtim na dinirinig ang kantang nagdala
Ng masasaya’t magagandang mga alaala
Ngunit sa paglipas ng panahon
Nanginginig na mga kamay ang naging hamon
Upang maibalik ang gitara sa kahapon
Bumabagal, dumadaing na sa pagbangon
Galaw ng kuwerdas ay humina
Nauwi sa mga bulong ang kanta
Mawawala na rin yata sa alaala
Mga minahal na pangalan at mukha
Binabalikan ang mga alaala
Muling dinarama ang mga nakalimutang saya
Sana ay may kasunod pa na kabanata
